Frå Liarvatnet til telt på Brogaheia om Knausane (21.09.2024)

Skrevet av Kaare_70

Kart

Bestigninger	Bergeheia (706moh)	21.09.2024
	Knausane (587moh)	21.09.2024
	Krunefjell (723moh)	21.09.2024
Andre besøkte PBE'er	Langavatnet demning (450moh)	21.09.2024
Andre besøkte PBE'er	Brogaheia våpenkonteinere (645moh)	21.09.2024

Denne strålande haustdagen skulle me gå frå parkeringa ved Liarvatnet og telta på Brogaheia ovanom Longavatnet, dette for å gjera alt klart til minnemarkeringa der oppe dagen etter. 80-års markeringa etter det allierte våpensleppet i november 1944 hadde kome i stand på mitt initiativ i tett samarbeid med Hjelmeland og Strand kommunar og HV-08. Sistnevnte har naturlegvis sterke band til hendingane pga. innsatsstyrke Osprey som har navn etter den første luftbårne Linge-operasjonen i Rogaland i desember 1943.

Kameraten og eg valde ikkje lettaste vegen som går om Grimsli og Forenesvatnet, men i finvêret ville me nytta dagen og gjekk om Småsildalen, Holmavatnet og Ospeskardet. Her tok me ein fin avstikkar oppom høgdedraget Knausane som med sine 587moh utgjer eit framifrå lokalt utsiktspunkt. Her kunne me ha mat- og kaffipause i T-skjorta og retteleg nyta livet.

Ved utløpet av Holmavatnet mot ruvande Liaknuten

Klassisk utsikt frå Ospeskardet mot Longavatnet og Vardhusheia

Den vesle tjødna under toppen av Knausane

På Knausane med utsikt mot Vardhusheia og -tjødnane

Frå same staden med utsikt sørover Longavatnet

Mat- og kaffipause på Knausane med Krunefjell og Bergeheia som bakteppe

Etter pausen fann me ned til Longavatnet/Vardhustjødnane, vidare nordover til stemmen og opp til den store flyttblokka med minneplata på Brogaheia. Etter avgang frå Liarvatnet kl. 1215 var me framme her etter om lag 5 timar medrekna den gode pausen.

Me nærmar oss stemmen i Longavatnet/Vardhustjødnane

Etter oppsetting av teltet på ein tørr og fin rabbe tok me turen oppom ura der restane av våpencontainerane framleis ligg. Vidare gjekk me heilt vest til toppen av Krunefjell og fekk nyta kveldsutsikten over Tysdalsheia, Forenesvatnet og tilbake til utgangspunktet ved Liarvatnet. Returen gjekk same veg og bratt oppom toppen av Bergeheia før det vart kveldsmat på stormkjøkkenet; betasuppe med pølse og suksesskake til dessert.