Naganibba og Svartavassknuten frå Liarvatnet (12.05.2019)

Kart

Bestigninger	Naganibba (747moh)	12.05.2019
	Aust for Naganibba (748moh)	12.05.2019
	Svartavassknuten (669moh)	12.05.2019

Maitur i Jørpelandsheia står høgt på lista, og denne gangen skulle Svartavassknuten til pers, etter 1 ½ forsøk i fjor. Flott vårver, men kaldt og vindfullt i høgda. Inn Småsildalen og opp på sørsida til Nagaheia. Så bratt opp normalvegen til Nibba, kor det var førsteklasses rundskue som vanleg.

Oppe av Småsildalen med tilbakeblikk mot begge "hodna"

Frå Naganibba mot Hengjanevatnet og eidet mot Svortingsvatnet, med Husafjellet sentralt i bakgrunnen. Lengst bak til høgre sjåast Neverdalsfjellet og ein flik av Troppevatnet

Mot Svortingsvatnet og Nagastølen like under Nibba

Mot Krokavatnet og retninga me skal vidare

Etter ein god matpause med nykokt kaffi i fint le, gjekk vegen austover høgdedraget og oppom den mindre markerte hovudtoppen; heile 28 år sidan sist eg var her! Krokavatnet let seg beundra med alle sine viker, før me la vegen bratt men greit ned i skardet mot Svartavassknuten. Her kom sjølvsagt mange kjente toppar og vatn til syne; med Godlifjellet, Bratteliknuten, Gryteholstjødna og Svartavatnet som dei viktigaste.

På hovudtoppen med utsikt mot Krokavatnet, som er høgstliggande vatnet i Strand med god margin

Første synet av Gryteholstjødna og Svartavatnet med Godlifjellet og Bratteliknuten

Frå same staden mot Svartavassknuten, som ikkje ruver i terrenget

Første synet av Øyavatnet og Holmavatnet med Liaknuten dominerande

Nede av bratta snåva me nesten over det som såg ut til å vera ein enkel husgrunn, truleg av Svinastølen som skal ha lege her inne. Herifrå gjekk det over den vesle kollen som vert kalla Finntopp, og ned endå ei ups før me faktisk fann ein brukbar sti enkelt til topps på Svartavassknuten. Det var praktfull utsikt nordover mot Øyavatnet, Holmavatnet og Liaknuten, medan det var litt mindre bratt og dramatisk sørover mot Svartavatnet, Bratteliknuten og Godlifjellet.

Frå Svartavassknuten mot Øyavatnet og Holmavatnet, med Krunefjell sentralt i bakgrunnen

Fornøgd på Svartavassknuten, innerste toppen i Strand

Det vart ny matpause før me valde å returnera same veg til skardet og så via stien langs Store Nagatjødna og same veg ned Småsildalen. Ein framifrå tur i flott vårskog i høgda, sikkert to veker seinare enn ved fjorden, med innslag av løvsangar, heipiplerke og ringtrost. Det var overraskande mykje elgskit ved skardet under Svartavassknuten, så det må vera ein brukbar elgstamme her inne. Til saman 6 ½ timar på tur.

Øyavatnet og Liaknuten sett frå ryggen aust for Store Nagatjødna

Mot Store Nagatjødna og Nagaheia bakerst

Kommentarer

Tittel:

Tilgjengelige tegn: 1000

Kommentartekst:

Du må være innlogget for å skrive kommentarer.