Raudberga og Simlenuten frå Sandvatnet (17.09.2022)
Skrevet av Kaare_70
Bestigninger | Raudberga (1433moh) | 17.09.2022 |
---|---|---|
Simlenuten (1440moh) | 17.09.2022 |
Dag 2 av langhelg med utgangspunkt ved Sandvatnet, om lag 17 km og 8 timar på tur i fint, men vindfullt haustver.
Laurdags morgon vakna me makeleg ved Sandvatnet kl. 0820, men til litt småregn på teltet. Det var ikkje heilt uventa, for vermeldinga var litt gråare enn den strålande dagen før. Men dråpane gav seg alt til me skulle ha frukost, og planane om langtur til Raudberga og Simlenuten nordover og vest mot Kvanndalen var det ingen grunn til å endra. Til det var skylaget heldigvis for høgt. Med heile 10 km i luftlinje til sistnevnte var planen å ha med telt for overnatting om lag halvvegs; som tenkt, så gjort.
Kl. 0950 var me av garde på T-stien mot Holmavasshytta, men alt ved stidelet til Kvanndalen tok me nokså beint nordover og kom etter kvart opp i den flotte dalen der Tverråna slyngar seg nedover frå Litlavatnet. Her var det endåtil god sti som gjekk vår veg, så det var retteleg lettgått. Fine innslag av fyllitt oppetter dalen gjorde óg at geologien og terrenget var spennande. Etter om lag 2 timar var me oppe ved Litlavatnet og tok ein god mat- og kaffipause der bekken kjem ned frå Blydalen.

Både oppetter dalen og langs Litlavatnet (som er langt ifrå lite!) var det mange kjempefine teltplassar, men me vart einige om å ha med oss teltet eit stykke til. Om lag 100 hm ovanom Litlavatnet og etter 6 km gange bestemte me oss likevel for at nok var nok, for ikkje særleg mykje høgare såg det ut til å vera langt skrinnare jordsmonn. Me fann ein fin plass på om lag 1200 moh med flott utsikt over Litlavatnet, rett nok vindutsett, men med ein del skiferheller som me fekk brekka laust, skulle nok teltet stå trygt.
Med lette sekkar tok me retning nordvestover og oppover langs høgre sida av Blydalen. Etter kvart kom me opp på platået på snaut 1400 moh vest for toppen av Litlavassnuten, fortsette nordover via eit søkk og så i nokså bein linje mot Raudberga, som gjorde lite av seg frå denne kanten. Etter noko opp og ned stod me fornøgde på dagens første topp drygt 1 ¼ time frå teltet etter 4 ¼ timar på tur. Her oppe hadde me sjølvsagt framifrå utsikt mot Isvatnet, Fitjanuten og ikkje minst dei tre høgaste i fylket, to i nord og ein beint i vest, på andre sida av Kvanndalen.




Men 1,2 km i luftlinje mot nordaust låg Simlenuten og lokka, så etter nokre bilder og kikkertstudier tok me oss ned på nordsida via ei snøfonn. Så via ein fortopp og eit skard tok me oss bratt, men enkelt opp på Simlenuten frå sør, 50 min. frå Raudberga og 5 timar frå bilen ved Sandvatnet. Her kom me endå tettare på dei to høgaste i fylket, og dessutan Litledalsflæene der me telta på første turen vår til nettopp desse toppane heilt tilbake i 1999.
Returen vart lagt nedom Isvatnet for vassfylling, og så tok me endeleg ein god mat- og kaffipause i godt le aust for Raudberga. Då me skulle pakka saman etter pausen vart me innhenta av ei byge med snødrev; den sorten hadde me observert både mot Skaulen og mot Blåbergnuten, men det vart heldigvis ikkje noko av det for vår del.


Tilbake til teltet følgte me vårt eige «spor», og droppa både toppen av Litlavassnuten og Skorpeskarnuten, men sistnevnte ville me prøva på neste morgon. Dermed var me tilbake ved teltet til enkel middag etter 8 forvitnelege timar på tur i dette flotte og lite besøkte høgfjellsterrenget.
Kommentarer
Simlenuten
Skrevet av kolla 21.09.2022 12:12Fin rapport frå dette området. Har merka meg navneendringa på Simlenuten til Litlavassnuten. Lette etter historiske kart, men fant ingen gode kart over dette området. Var og inne på tanken å konferere Kartverket, så bra me fekk ei avklaring.
Sv: Simlenuten
Skrevet av Kaare_70 21.09.2022 16:33Ja, og eg opplever Kartverket som veldig lyttande og konstruktive ift. innspel frå oss vanlege folk. Eg kjenner navnet Simlenuten frå gamle kart, og trudde det måtte vera feil med Litlavassnuten. For gamle kart anbefaler eg google-søk på «kartverket historiske kart», då vert du overraska over alt du finn, kart heilt frå 1800-talet og fram til våre dagar.