Starta i Svartdal der Skarsvegen startar. Gjekk den nye bilvegen og til Nord-Skaret. Heilt idyll, velstelt småbruk og hytter, og heilt fantastisk rasteplass ved vatnet med brygge, strand, utemøblar, bålpanne og innreda hytte open mot vatnet med masse sitteplassar og grill og takke! Flott å sjå det intakte kulturlandskapet med steingardar og denne kulturhistorisk verneverdige vegen bratt opp i skardet. Då vi kom til Hasletjønni, følgde vi stig på austsida av vatnet nesten heilt inn. Men så busha vi opp lia mot den vesle tjønni som ligg mellom Kvassfjell og den veldig bratte nabotoppen mot nord. Vi følgde nokre renner oppover, mest elg som hadde gått før oss, og vi måtte klyve litt innimellom, men kom ganske rett på toppen som er bratt og luftig. Utruleg flott utsyn! Her såg vi verkeleg «alt» frå ein ny vinkel, bl.a. rett bort i Valejuvet med Skor bak. Vi brukte litt over to timar opp (6 km), rasta på toppen, gjekk litt høgare trase bortover høgda tilbake, men kom omtrent ned akkurat der vi tok opp frå vatnet. Gjekk den gamle Skarsvegen ned frå Skaret. Burde gått den opp også, for den har fine kulturhistoriske oppslagstavler og er ein imponerande intakt historisk veg. 12,2 km, 620 hm, var borte i 4 t og 40 minutt. Benjamin var med.
User comments