Lang og flott fjellskitur. For det meste greitt føre, sett bort frå skare innimellom, og rundt avblæsne toppar. Gikk på ei blemme i starten, då eg følgde ei flott løype som trakkemaskina hadde laga. Sikta på feil skar, og då blei det retur. Ein god halvtime og 2 km ekstra km blei det. Men morro ned den maskin-trakka bakken. 55,7 km/t på fjellski, er bra tempo :) Mot skaret var det skråbratt og isete. Tok av skia, hadde på kjetting på skoa, ca. 200 meter på føtene. Så var det ei kort stigning før fellene kunne av, og det blei fin sigling innover i retning vatna. Her er det viktig å sjå til kor ein går over, då Øyangen har opa råk. Sikta meg mot Stornakken, og fann ei fin rute med fin snø oppover. Kom opp på ein rund topp, som gjorde meg usikker om eg kom over grunna stein, og terreng. Blei ein liten retur herfrå også, for å runde på nedsida. Greitt opp mot Stornakken, og eit fantastisk føre inn dalen før toppen. Like under topp-platået måtte skia av ca. 10 høgdemeter, då det var stein, og ikkje snø. Vidare 5 min, bort til varden. Nydeleg utsikt mot nord. Siglinga vidare, og ned austryggen var heilt fantastisk. Laussnø, og eg kunne køyre alpint-svingar med fjellski. Så bar det mot Tverrnakken. Her valde eg bevist å gå litt etter terreng, og ikkje rett på. Betre snø og ikkje så bratt. Ca 55 min. etter fyrste topp stod eg på Tverrnakken. Så var det å finne ei god rute ned i bratta i retning Veslenakken. Hadde tenkt på å følgje over sør, og ryggen bortover. Men til Søre Tverrnakken var det stein, og det hadde blitt av med ski. Droppa den, og slapp meg ned på 1358-vatnet. Her var det igjen fantastisk mjuk krystallisert snø. Veslenakken var vakker herifrå, fullstendig dekka med snø. Greitt opp til topp tre, 40 min. etter topp to. Litt mat og fotografering herifrå. Så bar det ned flanken i retning Øyangen. Dagens lengste nedkøyring, og fin snø heile vegen. Traverserte for å få mest mogeleg køyring i grei fart. Morro. Vel nede, var det lett å vurdere retur over vatna. Det blei Steinbusjøen, ikkje rett over Øyangen. Det blir ein litt lang sving, og ikkje sikkert det er lengre gåtid heller, då ein kjem fint inn å ryggen mot to hytter som står ut på halvøya. Så var det småkuppert før det stig lett opp mot Såteskar. Ned her som sommarruta er ikkje råd grunna stein. Så no vart det å sigle på skrå av skardet. Greit med skia ved retur. God fart herifrå og ned mot Tyin-blokkene, sidan eg kunne følgje maskintrakka spor. Noko sleten, men stor turopplevelse i nytt terreng for meg.
User comments