Åsliknuten og Krostølfjellet på ski frå Folkehjelpshytta (23.03.2022)
Written by Kaare_70
| Map |
|
|---|
| Ascents | Draget (686m) | 23.03.2022 |
|---|---|---|
| Krostølfjellet (793m) | 23.03.2022 | |
| Åsliknuten (805m) | 23.03.2022 | |
| Visits of other PBEs | Sandvassgjuvet (580m) | 23.03.2022 |
Med eineståande vermelding og snøforhold i Lyngsheia vart det endå ein spontan feriedag, og utruleg nok min første skitur her sidan ein skuletur tilbake på 80-talet. Planen var å prøva seg opp mot Sandvatnet og eit par av toppane der, i alle fall Krostølfjellet som eg hadde sett bort på frå Veraheia i haust.
Eg følgte skutersporet frå parkeringa ved Folkehjelpshytta til myrene sør for Kubbåsen, vidare langs 602-vatnet og opp til Sandvatnet. Det var fin snø på vatnet og garantert trygg is, så eg holdt god fart langs vestbreidda av vatnet med kurs mot Pramstød. Det var folk i ei av hyttene her, som eg óg møtte på Krostølfjellet seinare.
Etter ein snau times gange til Pramstød var det eit enkelt valg å prøva seg på Åsliknuten først, og med lett sekk gjekk det greit opp den bratte nordhellinga til stadig finare utsikt. 1 ½ time etter start frå Folkehjelpshytta kunne eg ta inn det flotte rundskuet frå den vardelause toppen, og det vart god tid til ein matpause. Overblikket var sjølvsagt veldig godt over Sandvatnet, men aller finast mot Nystøldalen og Krøys.
Etter forsiktig nedrenn var eg nede ved Pramstødleitet, skardet mot Krostølfjellet, og måtte ta eit valg om eg óg skulle få med meg Hjelmen. Eigentleg hadde eg hatt tid til det, men feiga ut fordi eg var aleine. Kursen vart derfor lagt opp lia mot Krostølfjellet, igjen med stadig finare utsikt. Oppunder og vestanfor toppen gjekk eg ut på eit utsiktspunkt og fekk flott overblikk over Krostøl og Nystøldalen. Herifrå var det kort veg til det vardelause toppunktet der det vart ny matpause; svært makelege 1 ¾ time etter ankomst på Åsliknuten.
Det vart eit fint nedrenn, og ei stund vurderte eg å gå opp på Veraheia att, men i staden kom eg på at eg ville gå over 687-toppen Draget og ta Sandvassgjuvet i nærare augesyn. Eg var heldig og kom meg trygt ned på ei snøfri hylle på stupkanten og kunne retteleg studera dette geologiske underet. Dei reknar med at Sandvassgjuvet vart forma på slutten av siste istida då enorme vassmassar pressa seg gjennom fjellet frå ein bredemt innsjø. Gjuvet er 7-800m langt, opptil 80m djupt og mellom 10 og 40m breitt. Det er vårt lokale jutulhogg, i si tid truleg forma i løpet av berre eit døgn!
Etter eit litt krongle nedrenn gjennom Bjørkegjuvskogen var eg tilbake ved bilen etter om lag 13 km, 600 hm og 4 ¾ timar på tur. Det var som nevnt litt folk å sjå, men svært lite anna liv denne flotte dagen, der eg aldri trengte å ta på hua eller ytterjakken.
User comments