Stemknuten frå Målandsdalen (27.12.2021)
Written by Kaare_70
Ascents | Stemknuten (521m) | 27.12.2021 |
---|
Frå parkeringa øvst i Målandsdalen går det som kjent traktorveg til Tjødnadalsheia og Krøys, men også til Stemtjødna ytterst i Nystøldalen. Dei siste åra har Tverråna frå Nystøltjødna vore nytta til kraftproduksjon, og vegen har derfor relativt høg standard, om enn svært bratt opp langs Tverråjuvet. Det var denne eg følgte om lag 3 km frå Rv. 13 til Stemtjødna før eg busha enkelt til topps på Stemknuten like nord for tjødna.
Denne dagen etter ei strålande julehelg var det eit tynt lag snø og fine sporforhold, men óg veromslag med kraftig vind i høgda. Eg såg spor av både hare, rev, rådyr og det som kan ha vore hjort eller elg. I tillegg såg eg ein flokk yndige stjertmeiser og skremde opp to svartkledde skogsfuglar, enten tiurar eller orrhanar; i farten klarte eg ikkje å artsbestemma dei.
Etter å ha nytt den flotte utsikten både mot Nystøldalen og Årdal kom eg meg ned til Stemtjødna og litt rolegare vindforhold. Den opprinnelege planen om å gå opp Stølsskardet til Skorpeheia var alt skrinlagt pga. den kraftige viden i høgda. I staden valde eg å gå forbi tjødna og eit stykke sørover høgdedraget, slik at eg fekk flott utsikt innover Nystøldalen. Ingen tvil om at dette må vera utgangspunkt for ein langtur gjennom heile den flotte Nystøldalen neste år!
Men slik forholda var, vart det vendereis same vegen som eg kom. Til saman om lag 8 km, 400 hm og 1 time 50 min. på tur.
User comments