Rundtur frå Vindøldalen (14.07.2021)

Tidleg oppmøte i Vindøldalen for ein langtur av det seige slaget. Ein lettløpt førsteetappe langs grusen vart etterkvart avløyst av eit terreng som var langt tyngre å ferdast i. Ei natt med regnver bidrog til at alt av lyng og mose var så glatt som berre lyng og mose kan bli, men ingen har vel sagt at fjelltoppsanking er ein komfort-idrett. Forholdsvis bratt langs sti og dyretråkk til Vassdalsfjella, før resten av dagens rute openbara seg for fullt.

© Steinar Aarvåg

På tvers av Fagerlidalen og opp første del mot Litjnebba var det stort sett lyng og myrlendt terreng å finne. Herifrå temmeleg fint til topps på Rognnebba, før det igjen gjekk smått ned ura på vestsida mot Botnnebba.

© Steinar Aarvåg

© Steinar Aarvåg

Ned til Nordåbotnvatna var det stadig små mosekledde hamrar å navigere rundt, og jammen var det meir lyng og motbakke i vente på nordsida av dalen opp mot Pekhøtta Aust. Mot Fruhøtta vart terrenget lettare, medan det ned mot Stygglifjellet igjen vart litt hit og dit mellom små hamrar og bergnabbar for å ta seg fram.

Etter å ha baska seg gjennom eit lite inspirerande terreng ned Stygglia bar det på slitne bein langs grusvegen tilbake til bilen. Eit godt innhogg på lista over Smultringar i Trollheimen vart feira med ein dukkert i Vindøla.