Skoranutane frå Jonstølen (10.04.2021)
Written by Kaare_70
Ascents | Skoranutane (1,425m) | 10.04.2021 |
---|---|---|
Visits of other PBEs | Jonstølen (720m) | 10.04.2021 |
Dette vart ei kjempehelg på flotte Jonstølen, endåtil med eksklusiv korona-leige for oss fire som var på tur. 40 cm nysnø gjorde dessutan føreforholda ideelle, nærast heilt til topps på nutane. Det var heldigvis brøyta opp til parkeringa ved Mosvatnet, og me kom fram til varm hytte fredagskvelden med rikeleg plass til å holda forskriftsmessig 2 m avstand.
Første turdag var det meldt vekslande ver med ein del vind, så me la turen opp Rennedalen med håp om å nå Skoranutane i jakta vår etter stortoppar over 1400 moh. Me holdt mot venstre oppetter heile dalen og hadde stort sett medvind. Det var mykje nysnø og ein del fokk, så førstemann fekk ein tung jobb med å trø løype for oss andre. Jamvel slalåmbriller var gode å ha heile dagen.
Me hadde heldigvis brukbar sikt i det litt rufsete terrenget oppunder Skoranutane og runda greit opp til toppen nordfrå. Inkludert ein hustrig pause nede i dalen brukte me 3 timar 20 min. til topps. Det var framleis noko sikt, og me såg endåtil heilt ned til Mosvatnet mellom skyene. Etter litt rådslagning skilte me lag her, slik at tre av oss returnerte same veg, medan den ivrigaste toppsamlaren fekk seg ein real runde vidare nordover.
Me var alle heldige med at veret betra seg på returen, og det vart to gode pausar i fint le nede i dalen. Om kvelden vart eg vitne til ein jaktande rev like utanfor hytta, ellers støkte me opp enkelte ryper og såg eit ravnepar.
Til saman om lag 12 km, 750 hm og snaut 8 timar på tur med tre gode pausar.
User comments