Kråkeberg og Høgabakka frå Tau (27.03.2021)
Written by Kaare_70
Så var dagen komen til å løysa største utfordringa på lista over pf≥50m for Strand, nemleg øytoppane på Hidle og Heng. Det vart elegant løyst med eit sporty ja frå Tau båtforening. Med ein rask båt denne fine vårdagen midt mellom to uversdagar, gjekk det ikkje meir enn eit kvarters tid på kvar av dei tre båtetappane.
Først stod Hidle for tur, eller rettare Sør-Hidle fordi Nord-Hidle er ei av Sjernarøyane. Med påkledning for kald båttur vart det ein sveitt gåtur i solsteiken frå Hidlevågen til topps på Kråkeberg/Hettulhaugen på 81 moh. Her var toppunktet udiskutabelt og lett å finna lengst sør på øya, og med framifrå utsikt mot Rennesøy, Åmøy og Tau. Ryfast tek faktisk ein sving innunder toppen, eg vil tru for å ta inn luft om lag midtvegs.
Etter ein halvtimes tid på landlege Hidle gjekk turen vidare til meir bebygde Heng, framfor alt pepra med hytter. Her følgte eg grusvegen frå Neset og i ein god bue opp mot Høgabakka med grillhytte, som etter alt å døma er høgaste punktet på øya. Det var fleire mulige toppunkt på ca. 54 moh, og eg var oppom alle utanom det nordlegaste der det står eit bustadhus.
Etter ein halvtime óg på Heng gjekk returen raskt tilbake til båthamna på Tau, og heile turen var unnagjort på snaut 1 ¾ time.
User comments