Vardhusheia, Bergeheia og Salane på ski frå Målandsdalen (24.01.2021)
Written by Kaare_70
| Map |
|
|---|
| Ascents | Bergeheia (706m) | 24.01.2021 |
|---|---|---|
| Salane (658m) | 24.01.2021 | |
| Vardhusheia (761m) | 24.01.2021 |
Med meir enn nok snø som bar godt, og framifrå styresnø på toppen, vart denne godversturen til Målands- og Brogaheia ein av mine aller finaste. Sjølv om det er blitt traktorveg til oppunder Prammaleitet og nå sist kraftutbygging i Målandsdalen, er det ikkje mange som finn hit opp, og denne dagen var det bare dyreføter og mine ski som teikna mønster i snøen.
Eg brukte som vanleg om lag 45 min opp traktorvegen frå Rv. 13 ved Boremyr. Fordi vegen var brøyta, vart det bering eit godt stykke oppi bakkane før skia kom på. Ikkje uventa var det anleggsmaskinar, røyrlager og anna utstyr langs vegen og på toppen, men då dette var tilbakelagt, var det heldigvis bare snøen, sola og meg. Eg hadde vore spent på om snøen bar, men som nevnt var det heilt eineståande forhold. Ikkje ein gang bekken frå Målandsvatnet var synleg, så eg kryssa den og holdt meg på høgre sida av Målandsvatnet.
Vel her oppe var det bare å cruisa sørover silkeflata mot Brogaheia og dagens hovudmål som var Vardhusheia, ein av mine desiderte favorittar i Jørpelandsheia. Dette massivet tek seg kledeleg ut frå dei fleste vinklar utanom austanfrå Krøys, og ikkje minst er utsikten formidabel på stupkanten. Etter snaue 2 ¼ timar var eg på toppen, og fekk meg ein velfortent kvil ved varden på kanten med panorama over kjente landskap. Det var flotte snøforhold nesten til topps, men avblåst og litt isete aller øverst.
Det vart kontrollert nedrenn til Brogaheia etter same trase, og reint herleg med finkorna snøføyke rundt skituppane. Nede på silkeflata att gjekk eg vidare vestover og til topps på Bergeheia. Det er nedanfor her, vest på Brogaheia, at ein ennå kan sjå restane etter containerane frå flysleppet her oppe i november 1944.
Sjå link til den interessante rekonstruksjonen av flysleppet og motstandsarbeidet i Strand her: https://www.youtube.com/watch?v=xdBoKVjBAgQ
Det var ennå mykje att av den fine dagen, og eg valde å holda høgda nordover Bergeheia og få med meg Salane. Her i den fine utsikten på brekket mot Tysdalsvatnet vart det tid til ennå ein pause før eg pakka saman og rann ned att til Prammaleitet. Det var bare å bestemma farten sjølv, etter kor bratt nedrennet vart lagt, og inga hast med å avslutta turen. I den låge ettermiddagssola var det vakre skyggeteikningar over alt i snøen .
Det var nok mellom ½ og 1 m snø på flatane, ein god del spor etter rype, hare og truleg rev, men det var ikkje liv å sjå. Tilbake ved bilen ved Rv. 13 etter om lag 17 km, 800 hm og snaue 5 ½ timar på tur.
User comments