Gjevilkasskamman (01.08.2020)

Full klaff med godver og helgefri! Camping på Rauøra og deretter ein lang dag over alle Gjevilvasskammane. Med sand mellom tærne etter natta starta vi dagen med fem tilnærma flate kilometer inn til Rensbekksetra. Deretter på god sti opp til Rensbekktjønna og vidare opp ura til Midtre Gjevilvasskam. Herifrå i artig terreng for armer og bein opp til Store Gjevilvasskam, som tydelegvis heiter Midtre, i alle fall om ein skal tru på boka på toppen (og det skal ein vel).

Deretter vidare i usedvanleg lettgått høgfjellsterreng som minna om ei blanding av betong og teppegolv via Indre Gjevilvasskam og til Nordre. Nokre telemarksvingar utan ski nedover snøfonna, ein litt seig motbakke, og vipps, så var vi på Hemre. Her innvilga vi oss ein god pause med både varmmat og utsikt mot ein av fleire store flokkar med tamrein i motsatt side av dalen.

Dagens største utfordring vart hakket mellom nord- og sørtoppen vidare langs ryggen, men med litt ruterekognosering for å finne tak for armer og bein, så kom vi da ned her og.

No gjenstod det berre å vaske seg rein i Gjevilvatnet etter endt tur, og akkurat dét greidde vi riktig så godt.