Rauma: Smørbottstinden og Gråfonnfjellet (pf 100 komplett) (27.08.2017)

Rauma pf 100 161/161

Etter turen til Storbotnshornet og fullføring av Sunnmørslista kom Torleiv og eg til Slettvikane seint på kveld. Fekk opp teltet og mekka mexikansk gryte med wienerpølser i som gjekk ned på høgkant. Stjerneklart, vindstille og fin temperatur.

Kom oss avgarde i halvti-titida eller noko slikt. Torleiv var noko tung i steget oppover den merka ruta mot Berill. Etter litt pausar og kartstudier vart vi eininge om å skille lag denne dagen, noko som er heilt problemfritt for begge. Han gjekk for 4 toppar i Norddal, ei kommune han har eit meir kjærleg forhold til enn Rauma. Så kunne eg gå for dei to toppane eg hadde på blokka, og begge kunne styre sitt eige tempo.

Turen over til Småhola er veldig fin. Stien er grei å følgje og er stort sett godt merka. Flotte tindar rundt ein heile tida og ikkje folk å sjå. Småhola var kjempeflott. Her er det muligheter for turar med fiskestang. Gjekk ganske rett nordvestover mot skaret og Gråfonnfjellet. Trur denne ruta er den beste, her var det lite ur og vanskar. Tok meg gode pausar på begge toppane i det eventyrlege veret. Ein liten titt på mobilen gjorde meg merksam på at Kroksleiven hadde bursdag, slikt kunne han vel ikkje fortelje meg den skåddebjønnen! Og korleis kunne eg vite det? Frå Smørbottstinden gjekk eg vestover eit stykke og så nedover og inn på samme ruta som eg kom opp. Var godt fornøgd med desse 2 toppane. Ikkje noko behov for klyvring til andre punkt, sjølv om eg ser janyga har hatt spennande prosjekt der! No frykta eg det vart mykje venting for bursdagsbarnet så trakka til på heimveg. Kom først til teltet i Slettvikane, men etter at eg hadde pakka soveposen til Torleiv høyrde eg han rett bak meg. For ei timing! Så då fekk han gratulasjonen, og gåva vart 1/2 liter cola og ein pakke potetgull i Valldal sentrum. Dette var ei gåve han sette enorm pris på, og den var fortært før vi kom til Liabygda. Ikkje noko nytt med andre ord!