Det blei litt fram og tilbake denne dagen. Værmeldingane var ikkje heilt klare på kva været skulle være. Men eg valte å stole på Yr, som var det mest optimistiske.
Starta med nokonlunde fint vær ved parkeringsplassen. Fin og tydeleg sti oppover mot Sætredalsvatnet. Nokre dropar regn kom, men ikkje meir enn at eg tålte det. Fulgte vidare delvis merkt sti oppover mot dalen mot Svoregga og Rundehogen. Oppe på høgda var det meir klønete å finne noko sti og den vart meir og meir utydeleg. Så her måtte eg følge med på kart og magefølelsen. Fann ut at eg ville gå på Kvasshornet først i håp om at tåka skulle lette på Kårnyken. På toppen av Kvasshornet var det tåke. Men i det eg stod der, så letta tåka, slik at eg likevel fekk litt utsikt. Jammen flaks. Tåka hang framleis litt over Kårnyken, men det var vind, så håpet var at tåka skulle lette etter kvart. Sikta meg ned i dalen og tilbake til stien til Kårnyken. Fulgte ein delvis tydeleg sti opp til Kårnyken og jammen eit lite stykke før toppen letta tåka som bestilt og temperaturen vart betre. Følelsen av lykke kan knapt være større.
Tok ein liten tur ned mellom Kårnyken og Kårnyken øst. Men det var litt bratt ned på begge sider og fare for tåke, fann eg det tryggast å la være. Etter ein liten rast på Kårnyken, bar det nedatt. Eg var oppom Svoregga. Der var stien noko tydelegare i alle fall eit stykke. Fann det fornuftig å gå ned vegen frå Sætredalsvatnet.
Flott tur denne dagen, sjølv med noko regnbyger på vegen og litt tåke.
Kommentarer