Blåtinden og Haddalhornet (28.12.2016)

På den første dagen i jula som hadde nokolunde anstendig vær tok eg beina fatt mot nok ein listetopp på Hareid/Ulstein-lista, nemlig Haddalhornet. Sidan det hadde vorte litt lite aktivitet dei siste dagane kunne eg like godt ta turen oppom Blåtind også.

Eg parkerte ved "Reveskuret", og gjekk for direkteversjonen rett opp raset. Første gong eg gjekk opp her hadde eg ikkje fylt 5 år enda. Bratt nok, syntest min juleribbemarinerte kropp i dag.

Mot toppen tiltok vinden, og ved varden var det riktig så stivt. To kjæringar dukka brått opp frå bak varden medan eg skreiv meg inn i boka. Dei hadde nok med å fote seg.

Frå Blåtinden sprang eg mot skaret mot Haddalhornet. Nedover her var det riktig så fint terreng og flott usikt. Ein står midt mellom Vartdalsfjorden, Ørstafjorden, Voldafjorden, Rovdefjorden, og Dragsundet, med flott utsikt både innover i fjordane, mot Ørstahalvøya, Rovde, og øyane utanfor. Virkelig mykje flott og kvile augene på!

På veg opp til Haddalhornet tiltok vinden på ny, så berre ein rask fotosession her. Fint, altså! At eg ikkje har vore her før.

Raskt ned att gjennom Klungsdalen, som er omtrent så spennande og alpin som ein dal blir på ytre søre sunnmøre. Potensiale for nokon enkle og artige alpinlinjer oppi her.

God sti tilbake til Haddal, og jogg tilbake til bilen. Virkelig anbefalelsesverdig tur. Neste gong tar eg kvartetten Haddalhornet-Blåtind-Kongsvoll-Kvamstua :-)