Frå Målandsdalen til Liarvatnet om Vardhusheia og Heiahodnet (13.09.2024)
Geschrieben von Kaare_70
| Karte |
|
|---|
| Besteigungen | Heiahornet (775m) | 13.09.2024 |
|---|---|---|
| Vardhusheia (761m) | 13.09.2024 | |
| Besuche anderer PBE | Langavatnet demning (450m) | 13.09.2024 |
| Brogaheia våpenkonteinere (645m) | 13.09.2024 |
På denne turen til Brogaheia ovanom Longavatnet skulle me montera minneplata etter det allierte våpensleppet her i 1944. Med i sekkane var både plata på 10-12 kg i rustfritt stål, kraftig batteridrill og anna naudsynt utstyr, så børene var litt tyngre enn vanleg. Sidan eg på denne måten fekk skyss til Boremyr, nytta eg høvet til å parkera min eigen bil ved Liarvatnet, og etter monteringa var planen å gå heim den vegen.
Trass i dei tunge sekkane var me ved den store flyttblokka på Brogaheia etter bare 1 ½ time på tur. Me fann ei ideell flate på austsida av steinen; relativt plan, i ei krå med brukbart le og godt synleg frå stien over heia. Montasjen gjekk óg effektivt, og me fekk endåtil prøvd tildekking av det standsmessige slaget med «balkongflagget» mitt. Så vart det ein sving oppom ura der dei rusta containerane framleis ligg, før me skilde lag og dei andre gjekk ned att til bilen sin.
Sjølv hadde eg med stormkjøkkenet, og i det brukbare vêret gjekk eg opp på Vardhusheia og hadde meg ei kosestund med ein enkel middag på stupkanten. Det var ein småsur trekk frå nord og litt snaut med solgløtt, så eg måtte finna livd bak ein liten bergvegg. Longavatnet var som venta smekkfullt etter fleire dagar med ausregn, og dette var første dagen med nokonlunde godt vêr.
Med låg vannstand hadde eg tatt snarvegen om Skitli, over den søre kanalen og om Ospeskardet, men nå var det best å gjera vendereis til Brogaheia og gå ned til stemmen den vanlege vegen. Med slik bløyte i terrenget freista det lite å gå ned til Grimsli om Forenesvatnet, til det var det etter alle solemerke altfor vått langs sørsida av vatnet. I staden var planen å gå om Ospeskardet, og eg fekk ein fin tur opp dit, ikkje minst fordi vêret hadde betra seg med solgløtt rett som det var.
Det freista heller ikkje å gå langs Liarvatnet, og sidan det var altfor lenge sidan eg hadde vore på Heiahodnet, tok eg like godt opp Gudbrandsdalen frå utløpet av Holmavatnet. Stigninga til topps gjekk greit på dei gode stiane, og 1 time 40 min frå eg var ved stemmen i Longavatnet stod eg på den fine kommunetoppen i Strand.
På veg ned mot Foreneset traff eg ein kar som viste seg å vera ein kjenning av familien, og han var den einaste eg møtte utanom turfølget mitt til Brogaheia. Det var som alltid godt å koma fram til bilen ved Liarvatnet, og det var ikkje fritt for at eg kjende det i beina etter 20 km, 1100 hm og litt over 7 ½ timar på tur. Av fugleliv såg eg fire liryper på Brogaheia, ei orrhøne ved Holmavatnet og ein jaktande tårnfalk nedanfor toppen av Heiahodnet.
Då skulle i alle fall alt vera klart for fellestur og minnemarkering på Brogaheia komande søndag 22. september!
Benutzerkommentare