Frå Forenesvatnet til Tysdal på ski (11.01.2026)
Søndag morgon ved Forenesvatnet etter ei stjerneklår og kald natt, var det ein uvanleg vakker, rosa vesthimmel og ennå lite vind. Men me visste at kraftig vindauke med stormkast var meldt utpå ettermiddagen, så alt kl. 0950 var me av gårde frå hytta. Me ville unngå kriginga oppover mot Brogaheia som me hadde erfart dagen før, så derfor la me returen langs nordsida av Forenesvatnet mot Tysdalsheia. Det fekk heller våga seg at ein av oss måtte gå 4 km opp til Boremyr etter bilen!
Me fekk ein flott tur på isen langs vasskanten og vidare oppover Tysdalsheia. Her var det ganske bra skiføre – sjølvsagt på dei frosne myrene – men óg over lyngtuer og einerkratt var det godt med skia til hjelp. Det var ein god del dyrespor, i alle fall av hjort og truleg rådyr, og både urin og skit av ein retteleg sværing som må ha vore ein elgokse.
Me sikta oss inn mot toppen av traktorvegen som me nådde kl. 1125, etter 1 time 35 min i ganske jevnt tempo frå hytta. Her skilde me lag ved at eg raska på nedover til Tysdal der eg sette att utstyret før traskinga vidare opp til bilen. Det tok 30 min ned til gards og 40 min langs Rv. 13, og dermed blei det 2 ¾ timar på tur, og me var trygt nede før uvêret slo til i høgda.
Det var lite liv å sjå denne dagen óg, men nede i Målandsdalen såg eg i alle fall ei ørn i luftig svev, truleg ei havørn.
Benutzerkommentare