Høgtoppane i Breheimen har vore omtenkt i mange år. Som skitur hadde nok vore fantastisk, men då skal mykje klaffe. No vart mine to fyrste 2000 toppar i Breheimen nådd til fots frå Middalen. Køyrde inn vegen til DNT-hytta Nørdstedalseter. Vegen opp og naturen under vegs var ei oppleving i seg sjølv. Like før DNT-hytta svinga eg til venstre på ny grusveg inn Middalen. Her var vegen ujamn, men det gikk bra. Heile 7.4 km var denne etappa, til der eg parkerte litt før ein tipp. Her følgde eg varda rute mot Trulsbu til eit vatn, og så prøvde eg å finne ei grei rute opp mellom toppane. Til Austre heldt eg godt ut nord. Ikkje vanskeleg å bestige denne, men ein blir andpusten. Det som imponerte mest på turen var den enorme brea nedanfor toppane. Men ein ser her at den minkar kraftig. Nokre bilder på Austre, og så ned på bandet og opp til Midtre. På avstand såg det bratt ut. Eg heldt med rett opp på svaa. Det fungerte greitt, og var ikkje vanskeleg. Tok meg litt tid her, såg bort på Vestre, og breane. Ei bre bråka kraftig tre gonger. Eg trur det var i fjellryggen sørover frå Midtre. Ned frå toppen, var det fint å gå på svaa. Tok sjans ned på skrå frå skardet, då eg var nede frå toppen. Gikk heilt greitt, men nokre store blokker måtte rundast. Kom litt for langt ned, då det var flotte sva her og. Då kom eg litt ut på bre, men i eit flatt parti, og den var kun ca. 0,5 - 2 meter tjukk. Fin tur nedatt i godt varmt ver. Utruleg flott landskap å kvile auga på når eg køyrde nedatt. To gonger over fjellevegen Turtagrø - Årdal er også berre kos.
Kommentarer