Gitlandsåsen frå Lerangsvatnet (10.05.2020)
Written by Kaare_70
Ascents | Gitlandsåsen (267m) | 10.05.2020 |
---|
Flott tur til Gitlandsåsen som tidlegare gav navnet til skogverneområdet som i seinare tid er kraftig utvida til bl.a. å omfatta Hesten. Det var ikkje dumt å velja tur i lågare lende denne dagen, for snøgrensa på Jørpeland låg mellom 500 og 600 moh, utruleg nok, og veret var svært skiftande. Det gjekk med tette byger på fleire kantar, bl.a. i Høgsfjorden, men eg var heldig og gjekk klar. Det var nok 25 år sidan eg var inne ved Gåsavatnet og Brekketjødna sist. Eg hadde studert kartet godt, og då eg kom inn til glenna eller leirplassen ved inste enden av Brekketjødna, fann eg stien som skulle kunna føra meg beint opp bratta til aust for sjølve toppområdet. Etter kartet å døma var nok dette ein gammal ferdsleveg mellom Erlandsdalen og Lerang, og stien var delvis nødla og lett å følgja.
Frå flata under toppområdet gjekk det óg eit tråkk, og det gjekk ikkje lenge før eg var på dei øvste svaberga og heldigvis fekk flott utsikt. Som venta var det framifrå utsikt like ned i Gåsavatnet med Eldridåsen beint imot, og mot Høgsfjorden med Idse og Idsal, dessutan andre vegen mot Hesten og Viddasfjellet. Mot Kolabygda og Erlandsdalen var det dessverre skog som tok det meste av utsikten. Retur same veg og vel ein time på tur.
User comments