Flott godverstur siste dagen i november, glatt på våte berg og eit lite snødryss. Første turen min frå Preikestolhytta til Jørpeland. Hadde ein bil ved kraftstasjonen og tenkte å koma ned om Kjellbrekk og Selemork.
Gjekk normalvegen til Moslivarden om Preikestol-stien og Slåtteskardet, flott og vintraleg i høgda. Det seig på med litt skodde rundt oss, men ikkje der me var og skulle vidare. Fann grei veg vidare nordover mot Sauafjellet, først ned og rundt ein del hamrar og sva, sidan opp til ei stor klovna flyttblokk der me tok ein god mat- og kaffipause i sola. Ikkje akkurat nokon steik, men brukbar varme og ikkje minst vindstilt.
Eit stykke nedanfor Moslivarden med utsikt nordover. Me ser den markerte Naganibba og Godlifjellet til høgre, dessutan ein flik av begge Buksetjødnane
På vegen ned frå Moslivarden kom me ut på kanten av stupet mot Åstølstjødna og kunne óg studera det særmerkte "Jutulhogget" nedanfor tjødna på nordsida. Her må det ha vore kjempekrefter i sving for lenge sidan; ikkje mange som går her inne og får med seg dette.
Utsikt mot Moslivatnet frå kvileplassen ved klovsteinen
Etter pausen vidare opp på ryggen mellom Sauafjellstjødnane og til varden på Sauafjellet, første gang på 27 år for min del. Så greit til topps på utsiktstoppen med det framande navnet Tårnfjellet; absolutt ikkje eit typisk lokalnavn.
Herifrå var det merka trase bratt ned i Rovadalen, og så var det kjende stiar til bilen via Tinturvatnet, Kjellbrekk og Selemork. 6 flotte timar på tur frå A til B i Jørpelandsheia, ganske utanom allfarveg. Om lag 700 hm stigning og 850 hm nedtur.
User comments