Eit døgn på Døldarheia (27.10.2018)
Written by Kaare_70
Ascents | Aksla (693m) | 27.10.2018 |
---|---|---|
Døldaren (735m) | 27.10.2018 | |
Grasdalsnibbene (680m) | 27.10.2018 | |
Vardafjell (661m) | 27.10.2018 |
Makelaust fin vermelding for helga! Tredje turen for dagen gjekk med tunge bører opp normalvegen frå Blikra. Då hadde me først parkert ein bil i Aurdal, og planen var å overnatta på toppen av Døldarheia og returnera over Sletthaug. Det vart relativt sein start, og me kappgjekk nærast med sola på vegen hennar ned i havet. Ho forsvann vestanfor Utsira før me var framme, men hadde såpass lys at me fann både varden og ein fin teltplass berre 6-7m derifrå. Det var frose i bakken, så me måtte improvisera litt med barduneringa, men det gjekk fint. Kvelden vart lang, men me kosa oss ute med bålbrenning i fint le halvvegs under eit lite overheng. Lys frå bygdene, stjernene og ein stor måne var fint selskap.
Det vart som venta ei kald natt i teltet; vatnet i drikkeflaska var frose i innerteltet, så det var nok nede i minus 10 utanfor. Praktfull morgonraude for den som måtte ut eit tidleg ærend, og like fin frukost i brukbart varmande morgonsol. Det vart først ein rusletur utan bør til Grasdalsnibbene i retning Sandeid, kor me fekk utsikt mot Ilsvåg og delvis mot Sandeid.
Så pakka me sekkene og returnerte via Døldarheim til Vardafjellet. Her prøvde me oss på ein snarveg sør for Stemvatnet, men det vart ikkje beine vegen pga. ein del skrentar. Me kom til slutt til topps på det eineståande utsiktspunktet og koka kaffi og naut livet. Så avslutta me turen ned stien til Sletthaug via Aksla. På Sletthaug var det stor aktivitet av paraglidarar, og me fekk låna ein bil av dei ned til Aurdal; førsteklasses vinn-vinn for alle.
Alt i alt ein svært innhaldsrik tur på veg inn i lågsesongen for uteliv! Av faunainnslag var det ein del trost og ei rype som rapa. Ved Vardafjellet såg me tre hjortar i firsprang og dessutan ei havørn som sirkla over toppen.
User comments