Frå Tysdal til Forenesvatnet om Solknuten (29.11.2025)
| Karte |
|
|---|
| Besteigungen | Fonna (599m) | 29.11.2025 |
|---|---|---|
| Solknuten (522m) | 29.11.2025 | |
| Besuche anderer PBE | Langavatnet demning (450m) | 29.11.2025 |
Flott overnattingstur i Jørpelandsheia i mellomsesong, med standsmessig overnatting i Jarle si hytte ved Forenesvatnet. Mellom anna fordi båten var snudd for vinteren la me start- og sluttpunktet til Tysdal og Boremyr i Målandsdalen. Dei 550 hm opp til Fonna frå Tysdal gjekk radig på om lag ein time, og i 12-tida var me oppe på denne vesle, men fine utsiktstoppen. Her kunne me observera to kongeørner i luftig svev over Krunefjell, men me møtte óg ein hjortejeger som var minst like overraska som oss over å treffa folk.
Me skulle bare ned til Forenesvatnet, men tok ein sving oppom Solknuten som óg er ein framifrå utsiktstopp. Nede på Tysdalsheia såg me óg kameraten til hjortejegeren, og dei hadde nok likt betre å rå over jakt-terrenget aleine – såpass forstod me!
I 1330-tida tok me ein god mat- og kaffipause på ei diger steinhelle ved Forenesvatnet, ein av dei få tørre plassane etter alt regnet dei siste dagane. Kryssing av dei flate myrene gav forresten retteleg god trening slik forholda var. Så etter ¾ time kvalitetstid i det fine og stille vêret fann me vegen bort til hytta og fekk fyr i omnen. Då hadde me vore 3 ¾ timar på tur.
Det var endå ein time med dagslys igjen, og den nytta me til å søka oss opp langs den gamle, men lite brukte stien til Longavatnet, på nordsida av åna. Me fann han ganske greit og skal nok få gått han opp dersom det vert fleire besøk på hytta. Longavassåna var eit flott syn i seg sjølv, så flaumstor som ho gjekk, og oppe ved stemmen var det som venta smekkfullt.
Tilbake ved hytta i 16-tida klårna det heilt opp, og utsikten mot vesthimmelen med silhuettane av Tibergfjell, Ternefjell og Reinaknuten var eineståande. Utover kvelden kom halvmånen opp og ein del stjerner blinka mellom skysløret som etter kvart trekte inn.
Benutzerkommentare