Frå vatn til vatn i Jørpelandsheia #2, til Kvednavatnet (02.02.2021)
Visits of other PBEs | Langavatnet demning (450m) | 02.02.2021 |
---|
Med framleis eineståande snøforhold i Jørpelandsheia og framifrå vermelding tok eg ein spontan feriedag for å nytta det sjeldne høvet. Planen var langt på veg å repetera turen min i 2018 frå Liarvatnet til Svartavatnet, men i staden gå inn til Kvednavatnet/Stemvatnet ovanom Bratteli der eg ikkje har vore før.
Det var langt betre føre og spor enn forrige tur til Longavatnet like etter det første skikkelege snøfallet i januar, og eg var faktisk oppe i sola ved Longavatnet etter berre 1 ½ time, som må vera ny rekord for meg. På myra før vatnet hadde sjølvaste skogens konge trava rett over skisporet i lange kliv, for det var store djupe spor i snøen. Dei såg ut til å vera heilt ferske, så eg vil tru han hadde høyrt meg og søkt seg vekk.
Vel oppe i sola tok eg ein matpause ved hytta som var anleggsbrakke under bygginga av stemmen på 1940-talet. Her traff eg ein kjenning som skulle same veg som meg sørover sjølve Longavatnet. Her var det skuterspor og fleire skispor, så det var lett og fint å gå. Vel til endes på vatnet og forbi bekken frå Svartavatnet, var eg i nytt og spennande landskap, og eg fann eit gammalt skispor som såg ut til å leia i retning Kvednavatnet. Det var greit å holda retninga, for klokka var 12 og sola stod beint i sør dit eg skulle. Det var som venta småbratt og krongle opp til bandet ovanom Kvednavatnet, men dei 70 hm i djupsnøen gjekk nokonlunde greit. Etter eit kort nedrenn var eg nede på vatnet og kunne orientera meg mellom dei høge fjellsidene. Det var fleire spor i retning Stemvatnet og Bratteli, så eg gjekk ut frå at folk har kome motsatt veg frå Bratteli i helga. Inn hit hadde eg då berre brukt 2 ½ timar med ein kort pause.
Vel inne i det tronge skardet mellom vatna kleiv eg litt opp i sida for å få overblikk over Stemvatnet før eg snudde. Eg valde å ikkje sleppa meg ned på vatnet og gå heilt ut til eg såg fjorden, sjølv om det hadde vore interessant. Planen får heller vera å koma opp frå fjorden ein sommardag og gå andre vegen.
Returen gjekk presis same veg heim att, og ved stemmen i Longavatnet vart det både møte med kjentfolk og ny matpause i sola, før herlege nedrenn til Forenesvatnet og Grimsli. Det var ikkje dyreliv å sjå, utanom elgspora og spor etter hare, rev og smågnagarar. Fasit for dagen vart om lag 22 km, 250 hm og 5 ½ timar på tur; og ein svært godt investert feriedag!
User comments