Longavatnet på ski frå Liarvatnet (16.01.2021)
Visits of other PBEs | Langavatnet demning (450m) | 16.01.2021 |
---|
Flotte snøforhold og islagt Liarvatn alt i midten av januar er lenge sidan, og sjølv om vatnet ikkje var "godkjent" av Folkehjelpa, tok me sjansen på å gå over. 10-15 minusgrader sidan nyåret borga for kvalitet, og det var spor etter folk etter fleire dagar med framifrå ver. Me visste at det ville bli seriøst trafikkaos i Dalen denne lørdagen, og starta derfor alt i 9-tida. Det var meldt tilskyande og med aukande vind, men det starta upåklageleg med skyfritt, stilt og 10-12 minusgrader.
Det var gode spor inn til Grimsli, men fleire stader med ekkelt overvatn på isen. Gildt å vera her inne att, og med tilnærma julekortstemning med snø på trea. Det var som venta spor oppover til Forenesvatnet, men overraskande få hadde gått før oss, det skulle visa seg å bare vera Jørpelandsfolk i to av hyttene. Det er alltid krongle opp vinterløypa til Forenesvatnet, og ikkje betre i 15-20 cm nysnø utan såle. Men me kom oss greit opp medan morgonsola leika over toppen av Krunefjell og Solknuten. Vel oppe på det vakre vatnet kom me opp i ei tydeleg "kuldegrop", for her reiv det skikkeleg i ansiktet.
Men her var det óg slutt på skispora, så ungdommen måtte sendast først og trø løype vidare opp mot Longavatnet. Det er mindre kupert her, og me såg fram til å koma opp i sola ved den gamle stemmen der me tenkte å ha pause. Etter om lag 2 ½ timar kom me endeleg opp til Longavatnet, og det var framleis ei bleik sol, men óg ein sur vind over vatnet. Me fann truleg den kaldaste plassen å eta, nemleg ute på sjølve stemmen, for etter kvart drog skyene seg framfor sola, og pausen vart derfor kort.
Opprinneleg var tanken å gå sørover vatnet, men i den sure motvinden me ville ha fått, vart det heller vendereis. Denne vart derimot heilt super, med kontrollert nedrenn, først i den eigentrødde løypa, sidan ned til Grimsli. Utanom hyttefolka ved Forenesvatnet traff me utruleg nok ikkje folk før me var nede i Grimsli att. Det var nok isforholda på Liarvatnet som skremde vekk folk frå å ta seg innover, for det var i alle fall eit yrande liv i Foreneset då me var tilbake på parkeringsplassen. Trafikkaoset med såg for oss, slo óg til for fullt, for det stod bilar langs vegen heilt ned til garden i Dalen.
Fasit for turen vart snaut 15 km, 150 hm og snaut 5 timar i uvanleg fine forhold på alle vis.
User comments